വഖഫ് നിയമ ഭേദഗതിക്കെതിരെ മുസ്ലിം ലീഗിന്റെ മഹാ റാലിയും പ്രചാരനാർത്ഥം മഞ്ചേശ്വരത്ത് വാഹന ജാഥയും : കോഴിക്കോട് സമുദായ ഐക്യ പ്രതീകം
കോഴിക്കോട് | 2025 ഏപ്രിൽ 14: വഖഫ് നിയമ ഭേദഗതിക്കെതിരെ മുസ്ലിം ലീഗ് ശക്തമായ പ്രതിഷേധത്തിന് ഒരുങ്ങുകയാണ്. നിയമ ഭേദഗതിയുടെ പശ്ചാത്തലത്തിൽ മുസ്ലിം ലീഗ് സംസ്ഥാന കമ്മിറ്റി കോഴിക്കോട് കടപ്പുറത്ത് ഏപ്രിൽ 16-ന് ബുധനാഴ്ച ഒരു മഹാ റാലി സംഘടിപ്പിക്കുമെന്ന് പാർട്ടി പ്രഖ്യാപിച്ചു ഉച്ചയ്ക്ക് 3 മണിക്ക് ആരംഭിക്കുന്ന റാലി, ജനാധിപത്യ മൂല്യങ്ങൾക്കും മുസ്ലിം സമുദായത്തിന്റെ അവകാശങ്ങൾക്കും വേണ്ടി നിലകൊള്ളുന്നതായിരിക്കും.
സർക്കാരിന്റെ വഖഫ് നിയമ ഭേദഗതി മുസ്ലിം സമുദായത്തെ ലക്ഷ്യമിട്ടതും അവകാശങ്ങൾ ഹനിക്കുന്നതും ആണെന്ന് ലീഗ് നേതാക്കൾ ആരോപിക്കുന്നു. രാഷ്ട്രീയ, സാമൂഹിക രംഗങ്ങളിലെ പ്രമുഖർ പങ്കെടുത്ത് പ്രതിഷേധത്തിന് ഊർജം പകരും.
മഹാ റാലിയുടെ ഭാഗമായുള്ള പ്രചരണ പ്രവർത്തനത്തിന്റെ ഭാഗമായി, മഞ്ചേശ്വരം മണ്ഡലം മുസ്ലിം ലീഗ് ഏപ്രിൽ 15-ന് ഒരു വാഹന പ്രചരണ ജാഥയും സംഘടിപ്പിക്കുന്നു. ജാഥ ഹോസങ്ങാഡിയിൽ നിന്ന് ആരംഭിച്ച് മജിറ്പള്ള, മിയാപടവ്, പൈവലികെ, പെർമുദാ കാട്രത്തട്ക, കുമ്പള എന്നിവിടങ്ങൾ വഴി യാത്ര ചെയ്ത് വൈകുന്നേരം 6 മണിയോടെ ഉപ്പളയിൽ സമാപിക്കും.
ജാഥയുടെ മുഖ്യലക്ഷ്യം സമുദായത്തെ നിയമഭേദഗതിയുടെ ഗുരുതരത്വത്തെക്കുറിച്ച് ബോധവത്കരിക്കുകയും എതിര്‍പ്പിന് ശക്തമായ പിന്തുണ ഉറപ്പാക്കുകയും ചെയ്യുന്നതാണ്. പ്രാദേശിക നേതാക്കളുടെയും പ്രവർത്തകരുടെയും സജീവ സാന്നിധ്യത്തിലൂടെ ജാഥയ്ക്കും റാലിക്കുമൊപ്പമുള്ള പൊതുജന പങ്കാളിത്തം വൻതോതിൽ ഉണ്ടാകുമെന്നാണ് പ്രതീക്ഷ.