കർണാടകയിലെ ഹുഡൂർ ഗ്രാമ പഞ്ചായത്ത്, ഇന്ത്യയിൽ ഡിജിറ്റൽ ലൈബ്രറി സ്ഥാപിച്ച ആദ്യ ഗ്രാമമെന്ന നേട്ടത്തിനു പുറമേ, കോവിഡ് നിയന്ത്രണത്തിലും വികസന മുന്നേറ്റങ്ങളിലും ദേശീയ ശ്രദ്ധ നേടിയ മാതൃകാ പഞ്ചായത്താണ്. ദേശീയ റൂറൽ ഡെവലപ്മെന്റ് വിഭാഗത്തിന്റെ മികച്ച വികസിത പഞ്ചായത്തിനുള്ള പുരസ്കാരവും ഗാന്ധി അവാർഡും ഉൾപ്പെടെ നിരവധി അംഗീകാരങ്ങൾ ഈ ഗ്രാമത്തിന് ലഭിച്ചിട്ടുണ്ട്. ഈ മികവിന്റെ കേന്ദ്രത്തിലേക്ക് മർകസ് നോളേജ് സിറ്റി മാനേജിങ് ഡയറക്ടർ പ്രൊഫസർ അബ്ദുൽ ഹക്കീം അസ്ഹരി അടുത്തിടെ സന്ദർശനം നടത്തി.
സന്ദർശന വേളയിൽ പഞ്ചായത്ത് പ്രസിഡന്റ് എച്.എ. ഹംസയുമായി പ്രൊഫസർ അബ്ദുൽ ഹക്കീം സൗഹൃദം പങ്കിടുകയും ഹുഡൂരിന്റെ നേട്ടങ്ങളെ അഭിനന്ദിക്കുകയും ചെയ്തു. “കേവലം തൊഴിലിനപ്പുറം, സ്ഥാനമാനങ്ങളെ ഉത്തരവാദിത്തമായും സാമൂഹിക പ്രതിബദ്ധതയെ അടിസ്ഥാന ചുമതലയായും ഉൾക്കൊള്ളുന്ന അധികാരികളും ജനങ്ങളും ഉള്ളപ്പോൾ മാത്രമാണ് ഇത്തരം നേട്ടങ്ങൾ സാധ്യമാകുന്നത്,” അദ്ദേഹം അഭിപ്രായപ്പെട്ടു. ഒരുമയും സൗഹാർദവും നിലനിൽക്കുന്ന പരിസ്ഥിതിയാണ് സമൂഹമാറ്റത്തിന്റെ വിപ്ലവങ്ങൾക്ക് വഴിയൊരുക്കുന്നതെന്നും അദ്ദേഹം കൂട്ടിച്ചേർത്തു.
നമ്മുടെ നാട്ടിലെ അധികാരികൾ ഇത്തരം മാതൃകാ വികസന മാതൃകകൾ നേരിട്ട് പഠിക്കാനും വിലയിരുത്താനും സമയം കണ്ടെത്തണമെന്ന് പ്രൊഫസർ അബ്ദുൽ ഹക്കീം ഊന്നിപ്പറഞ്ഞു. “ആശയപരമായ വികാസവും നാടിന്റെ പുരോഗതിയും ഇത്തരം പഠനങ്ങളിലൂടെ മാത്രമേ സാധ്യമാകൂ,” അദ്ദേഹം വ്യക്തമാക്കി. ഹുഡൂർ പഞ്ചായത്തിന്റെ മാതൃക വികസനത്തിന്റെ പുതിയ മാർഗങ്ങൾ തുറക്കുന്നതിന് പ്രചോദനമാകുമെന്നാണ് പ്രതീക്ഷ.
ഈ സന്ദർശനം, വികസനത്തിന്റെ സാധ്യതകളെക്കുറിച്ച് ചർച്ചകൾക്ക് വഴിയൊരുക്കുകയും മറ്റ് പ്രദേശങ്ങൾക്ക് ഹുഡൂരിന്റെ മാതൃക പിന്തുടരാനുള്ള പ്രചോദനം നൽകുകയും ചെയ്തു.